१० चैत, काठमाडौं । जनता समाजवादी पार्टी (जसपा) नेपाल, सिराहाले दलित परिवारको घर भत्काएको आरोपमा पक्राउ परेका औरही गाउँपालिका अध्यक्ष शिवजी यादव सहितलाई रिहाइ गर्न माग गरेको छ ।
आइतबार जिल्ला प्रशासन कार्यालय सिराहामा ज्ञापन पत्र बुझाउँदै जसपा नेपालले सिराहा प्रहरीले ८ चैतमा अध्यक्ष यादव, पूर्व वडाध्यक्ष दिलीप यादव लगायतका व्यक्तिहरूलाई छलफलको लागि बोलाएर कुनै पूर्व जानकारी विना थुनामा राखेको आरोप लगाएको छ । भोलिपल्ट, शनिबारकै दिन झुटा आरोप लगाई छुवाछूत सम्बन्धी मुद्दा लगाइएको जसपा नेपालको आरोप छ ।
जसपाले यस घटनालाई राजनीतिक प्रतिशोधको रूपमा व्याख्या गर्दै गम्भीर आपत्ति जनाएको छ ।
जसपा नेपालका सिराहा जिल्ला अध्यक्ष अशोक यादवको नेतृत्वमा बुझाइएको ज्ञापनपत्रमा पार्टीले गाउँपालिका अध्यक्ष जस्तो सम्मानित पदमा रहेका जनप्रतिनिधिलाई अन्यायपूर्वक थुनामा राख्न नहुने भन्दै अविलम्ब रिहाइको माग गरेको छ ।
उनीहरू सवार मोटरसाइकल समेत प्रहरीले नियन्त्रणमा लिएको भन्दै जसपाले यसलाई मानवअधिकारको उल्लंघन भनेको छ ।
रिहाइ नगरे आन्दोलन चर्काउने समेत जसपा नेपालले चेतावनी दिएको छ।
आगामी जेठ १७ गतेबाट हुने विष्णु महायज्ञको लागि गत फागुन १० गते गाउँपालिका अध्यक्ष यादवसहितले स्थानीय दीपक मरिक डोमको घर भत्काएका थिए ।
गाउँपालिका अध्यक्ष र पूर्व वडाध्यक्षलाई प्रहरीले गत शुक्रबार मात्रै पक्राउ गरिसकेको छ । शनिबार प्रहरीले तीन जनामाथि जातीय विभेद तथा छुवाछूत कसुरमा जाहेरी दर्ता गरेको छ ।
सिराहा जिल्ला अदालतबाट पाँच दिन थुनामा राख्न समेत आज म्याद थप भएको जिल्ला प्रहरी कार्यालय सिराहाले जनाएको छ ।
